Xukuumadda Somaliland ayaa si kulul u cambaaraysay hadal dhawaan ka soo yeedhay dawladda Finland,

 Xukuumadda Somaliland ayaa si kulul u cambaaraysay hadal dhawaan ka soo yeedhay dawladda Finland, waxaanay dawladda Finland ka dalbaday inay Somaliland raali geliso.

Labada dawladood ayaa isku maandhaafsan nin la sheegay inuu u dhashay magaalada Muqdisho ee dalka Somaliya, oo ay dhawaan Finland u soo masaafurisay Hargeysa, ka dib markii lagu eedeeyay dambiyo kala duwan. Agaasimaha waaxda socdaalka ee dawladda Finland Mr. Jorma Vuorio, ayaa bishii la soo dhaafay been abuur ku tilmaamay waraaq ay golaha la talinta sharci ee ninkan la soo masaafuriyay sheegeen inay ka heleen Somaliland, taas oo muujinaysay inaanu ninkani joogi Karin Somaliland. Sidoo kale waxa uu agaasimuhu tilmaamay inay Somaliland tahay meel qof kastaa uu si fudud uga heli karo waxa uu doono, waxaanu yidhi, "Waa suuragal in la helo dhukumenti foorjeri ah oo sita magaca Somaliland, qof kasta ayaa waxa uu doono ka heli kara halkaas, (Somaliland) xattaa haddii loo baahdo baasaboor ayaa laga heli karaa."

Hase yeeshe Wasiirka dib u dejinta Somaliland Maxamed Cismaan, oo Salaasadii la soo dhaafay xafiiskiisa Hargeysa ugu waramay weriyayaal ka socday Wargeyska Helsingin Sanomat oo ka soo baxa dalka Finland, ayaa cambaareeyay hadalkaas Agaasimaha. "Somaliland maaha xero qaxoonti. Waa in dawladda Finland naga raali gelisaa oo ay ninkan dib u qaadaa." Ayuu yidhi Wasiirku, waxaanu intaas raaciyay "Aragtidayada, ninkan waa loo soo tahriibiyay Somaliland, mana aqbali karno tan."

Waxa uu wasiirku sheegay in dawladda Somaliland aanay wax jawaab ah ka helin xidhiidho ay dawladda Finland kala samaysay qadddiyadan, "Saraakiisha Finland sinaba noogumay soo jawaabin. Waxaanan tan u macnaysanaynaa cadaawad lanoola jeedo, waanan ka xunahay."

Wasiirka Somaliland u hadlay oo ka jawaabaya hadalkaas uu Agaasimaha Finland ku weeraray Somaliland waxa uu yidhi, "Qoraalkani waxa uu tilmaamayaa diblomaasiyad darro iyo sidoo kale aqoon la'aan ka haysa Somaliland. Waxaanu filaynay in qof xilkan sare oo kale hayaa aanu samayn qoraalkan oo kale. Ninkani [Agaasimaha] waxa uu taageerayaa qaska iyo dawlad la'aanta. Waxa uu jebinayaa xuquuqda bini-aadamka ee aasaasoga ah ee ninkan la soo masaafuriyay."

Waxa uu Wasiir Cismaan, sheegay inuu la yaabay in weli ninkii la soo masaafuriyay uu Hargeysa joogo, "Waxaanu u jari doonaa waaran. Haddii ay Boolisku helaan waxaanu tixgelin doonaa waxaanu ka yeeli doono. Waxa suurto gal ah in dib loogu diro Somaliya."

Waxa uu wasiirku tilmaamay inaanay Somaliland ogolayn in dadka la soo tarxiilo ay dawladaha shisheeye ku soo daadiyaan Somaliland.

Source: www.geeska.net, Wargeyska Geeska Afrika, Hargeysa

Nuorten tieto- ja neuvontapavelut verkossa: